Mat 27 | NdeIBE | STEP | Ekuseni ngovivi bonke abaphristi abakhulu labadala babantu benza isinqumo sokumbulala uJesu.

Matthew 27

UJudasi Uyazibophela

1 Ekuseni ngovivi bonke abaphristi abakhulu labadala babantu benza isinqumo sokumbulala uJesu. 2 Bambopha bamqhuba bamnikela kuPhilathu umbusi.

3 Kwathi uJudasi, owayemnikele, esebona ukuthi uJesu wayeselahliwe, wadabuka ngokuzisola, wabuyisela izinhlamvu zesiliva ezingamatshumi amathathu kubaphristi abakhulu labadala. 4 Wathi, “Ngenze isono, ngokuba nginikele igazi elingelacala.” Baphendula bathi, “Silani lalokho thina? Lokho kungumlandu wakho.”

5 Ngakho uJudasi wayiphosela ethempelini leyomali wahamba. Wasuka lapho wayazibophela.

6 Abaphristi abakhulu bazidobha izinhlamvu zemali lezo bathi, “Kungaphandle komthetho ukufaka imali le emnikelweni ngoba yimali yegazi.” 7 Ngakho basebemisa ukuyisebenzisa ukuthenga isiqinti sombumbi sibe yindawo yamangcwaba abantu bezizweni. 8 Yikho yabizwa ngokuthi yiNsimu yeGazi kuze kube manje. 9 Kwasekugcwaliseka okwakhulunywa nguJeremiya umphrofethi ukuthi: “Bathatha izinhlamvu zesiliva ezingamatshumi amathathu, intengo eyamiswa ngaye ngabantu bako-Israyeli, 10 bazisebenzisa ukuthenga insimu yombumbi, njengokulaywa kwami yiNkosi.”

UJesu Ephambi KukaPhilathu

11 Ngalesosikhathi uJesu wamiswa phambi kombusi, umbusi wasebuza wathi, “Uyinkosi yamaJuda na?” “Yebo, kunjengoba usitsho,” kuphendula uJesu.

12 Wayesithi nxa ethonisiswa ngabaphristi abakhulu labadala angaze aphendula.

13 UPhilathu wasembuza wathi, “Awubuzwa yini ubufakazi abakwethesa bona?” 14 Kodwa uJesu wathula, kazaphendula lamlandu munye – wammangalisa kakhulu umbusi.

15 Kwakungumkhuba wakhe umbusi ukuthi ngeDili akhulule isibotshwa esikhethwe lixuku labantu.

16 Ngalesosikhathi kwakulesibotshwa esasigange kubi, sithiwa nguBharaba.

17 Kuthe abantu sebebuthene uPhilathu wababuza wathi, “Nguwuphi elifuna ngilikhululele yena na: uBharaba, loba uJesu othiwa nguKhristu?” 18 Ngokuba wayesazi ukuthi abaJuda bamletha kuye uJesu ngenxa yomona.

19 Kwathi uPhilathu esahlezi esihlalweni sakhe sokwahlulela umkakhe wamthumela leli ilizwi wathi: “Ungayingeni indaba yomuntu lowo ongelacala, ngokuba lamuhla ngihluphekile kakhulu ngaye emaphutsheni.”

20 Kodwa abaphristi abakhulu labadala bakhuthaza abantu ukuthi bacele uBharaba, bathi uJesu kabulawe. 21 Wabuza umbusi wathi, “Nguwuphi kulaba ababili elifuna ngilikhululele yena na?” Baphendula bathi, “UBharaba.”

22 “Ngenzeni, pho, ngoJesu othiwa nguKhristu?” wabuza uPhilathu. Bonke bamphendula bathi, “Mbethele!”

23 “Yindaba? Woneni?” wabuza uPhilathu. Kodwa bavungama ngamandla bathi, “Mbethele!”

24 Kwathi uPhilathu esebona ukuthi akuselamanceda, kwasekuzavuka isiyaluyalu, wathatha amanzi wageza izandla zakhe phambi kwexuku wathi, “Angilacala ngegazi lalumuntu. Ngumlandu wenu!”

25 Bonke abantu bamphendula bathi, “Yekela igazi lakhe libe phezu kwethu laphezu kwabantwabethu!” 26 Wasebakhululela uBharaba. Wathi uJesu katshaywe, wasemnikeza ukuba abethelwe.

Amabutho Ahoza UJesu

27 Amabutho ombusi asemthatha uJesu amngenisa ePhritoriyamu, inkundla yombusi, wabuthanelwa liviyo lonke lamabutho.

28 Bamkhumula izigqoko zakhe bamgqokisa ijazi elibomvu, 29 basebeseluka umqhele wameva bamethesa wona. Bamphathisa intonga kwesokunene sakhe baguqa phambi kwakhe bamhoza. Bathi, “Bayethe, Nkosi yamaJuda!”

30 Bamkhafulela, bamthathela leyontonga bamtshaya baphindaphinda ekhanda.

31 Sebemhozile, bamhlubula ijazi bamgqokisa ezakhe. Basebemqhuba besiya mbethela.

Ukubethelwa Kwakhe

32 Bathi sebephumela ngaphandle bahlangana lendoda yaseKhureni, ethiwa nguSimoni, bayicindezela ukuthi ithwale isiphambano.

33 Bafika endaweni ethiwa kuseGoligotha (okutsho ukuthi Indawo yoKhakhayi).

34 Khonapho uJesu bamupha iwayini ukuba anathe, lixutshwe kanye lenyongo; kodwa wonela ukulinambitha wasesala ukulinatha.

35 Kwathi sebembethele behlukaniselana izigqoko zakhe ngokwenza inkatho. 36 Bahlala phansi bamlinda khonapho. 37 Ngaphezu kwekhanda lakhe babeka umbhalo wecala lakhe usithi: LO NGUJESU, INKOSI YAMAJUDA.

38 Izigebengu ezimbili zabethelwa kanye laye, omunye ngasekunene kwakhe, omunye ngasekhohlo. 39 Labo ababesedlula lapho babemthuka, benikina amakhanda besithi,

40 “Wena ozadiliza ithempeli ulakhe ngezinsuku ezintathu, zisindise! Yehla esiphambanweni uma uyiNdodana kaNkulunkulu!”

41 Ngokunjalo abaphristi abakhulu, labafundisi bomthetho kanye labadala bamhoza.

42 Bathi, “Wasindisa abanye, kodwa uyehluleka ukuzisindisa yena! UyiNkosi yako-Israyeli! Kehle manje esiphambanweni ukuze simkholwe.

43 Uthembele kuNkulunkulu. UNkulunkulu kamlamlele phela manje nxa emfuna, ngoba wathi, ‘NgiyiNdodana kaNkulunkulu.’ ”

44 Ngaleyondlela izigebengu ezazibethelwe kanye laye lazo zambhaceka ngenhlamba.

Ukufa KukaJesu

45 Kusukela ngehora lesithupha kusiya kwelesificamunye umnyama wembesa lonke ilizwe.

46 Ngehora lesificamunye uJesu wamemeza ngelizwi elikhulu wathi, “Eloyi, Eloyi, lamasabakthani?” – okutsho ukuthi, “Nkulunkulu wami, Nkulunkulu wami, kungani usungidelile na?”

47 Kwathi abanye kwababemi lapho bekuzwa lokho bathi, “Ubiza u-Elija.”

48 Masinyane omunye wabo wagijima wathatha isipontshi. Wasicwilisa phakathi kweviniga yewayini, wasixhuma oluthini wasidlulisela kuJesu ukuthi anathe.

49 Abanengi bathi, “Myekele. Ake sibone ingabe u-Elija uzakuza azomsindisa.”

50 UJesu esephindile ukumemeza ngelizwi elikhulu, umoya wakhe waphuma.

51 Kusonaleso isikhathi ikhetheni lethempeli laqhekezeka kabili kusukela phezulu kusiya phansi. Umhlaba wazamazama lamatshe aqhekezeka.

52 Amathuna avuleka, izidumbu zabanengi abantu abangcwele abafayo zavuswa baphila.

53 Baphuma emathuneni, kwathi ngemuva kokuvuka kukaJesu baya edolobheni elingcwele bavela ebantwini abanengi.

54 Kwathi ukuba induna yekhulu kanye lalabo eyayilinde uJesu labo bebona ukuzamazama komhlaba kanye lakho konke okwakwenzakele, besaba kakhulu, bababaza bathi, “Ngeqiniso ube eyiNdodana kaNkulunkulu!”

55 Kwakulabesifazana abanengi bebonela bucwala. Babelandele uJesu besuka eGalile ukuthi banakekele iziswelo zakhe. 56 Phakathi kwabo kwakuloMariya Magadalena, loMariya unina kaJakhobe loJose kanye lonina wamadodana kaZebedi.

Ukungcwatshwa KukaJesu

57 Kwathi ilanga selithambeka, kwafika indoda enothileyo yase-Arimathiya, ithiwa nguJosefa, yena owayesemgumfundi kaJesu.

58 Waya kuPhilathu wayacela isidumbu sikaJesu, uPhilathu walaya ukuba kasiphiwe.

59 UJosefa wasithatha isidumbu wasigoqela ngelembu elihlanzekileyo lelineni, 60 wayasibeka ethuneni lakhe elitsha ayeligubhe edwaleni. Wagiqela ilitshe elikhulu emlonyeni wethuna wasehamba.

61 UMariya Magadalena lomunye uMariya babehlezi khonapho malungana lethuna.

Abalindi Ethuneni

62 Ngosuku olulandelayo, oluza ngemuva koSuku Lokulungisela, abaphristi abakhulu labaFarisi baya kuPhilathu. 63 Bathi, “Nkosi, siyakhumbula ukuthi wathi esaphila umkhohlisi loyana wathi, ‘Ngemuva kwezinsuku ezintathu ngizavuka.’ 64 Ngakho yenza ukuthi ithuna lilindwe kuze kube lusuku lwesithathu. Engxenye abafundi bakhe bangeza bantshontshe isidumbu, batshele abantu ukuthi uvukile kwabafileyo. Inkohliso le ingabambi kakhulu kuleyakuqala.”

65 UPhilathu waphendula wathi, “Thathani abalindi. Hambani liyovikela ithuna njengokubona kwenu. 66 Base behamba bayalilinda baqinisa ngokubeka uphawu phezu kwelitshe njalo bamisa abalindi.